Demat Account Kaise Use Karein? Pehla Share Kharidne Se Pehle Poori Guide | EMIHisab
← EMIHisab.in
Share Market Guide

Demat Account Kaise Use Karein? Pehla Share Kharidne Se Pehle Poori Guide

✍️ Rahul Kumar Yadav · EMIHisab · 14 November 2026

Pehla share kharidne chale the, app ne pehle demat khata khulwa liya? Uljhan wahin se shuru hoti hai — demat alag, trading alag, charges alag. Is guide me sab kuch seedhi bhasha me hai: khata kholna, share kharidna-bechna, T+1 settlement, aur wo kharch jo "free account" wale nahi batate.

14 November 2026 · Last updated: November 2026 · 9 min read · By EMIHisab Team
Demat Account Kaise Use Karein — ghar baithe phone par apna share portfolio dekh raha naya niveshak

Pehle din ki kahani

Mere ek dost Ravi ne pichhle saal pehli baar share kharidne ka mann banaya. App khola, ek jaani-pehchani company chuni, BUY ka button dabane hi wala tha ki app bola — pehle demat account kholo. Ravi wahin atak gaya. Demat alag, trading alag, paisa kahan se katega, share aakar rukega kahan — sab kuch sar par gir gaya.

Agar aap bhi wahin atke ho jahan Ravi atka tha, to ye article bilkul aapke liye hai. Bhaari English nahi, seedha hisaab — demat khata kya hai, khulta kaise hai, aur iske wo charges jinpar kholne wale kabhi baat nahi karte.

Demat account hota kya hai?

Purane zamane me shares kagaz ke certificate hote the. Almari me sambhal ke rakhe jaate the, bechna ho to wohi kagaz daak se bhejo, hafton intezaar karo. Kagaz ghum gaya, to samjho share hi ghum gaya.

Demat ka matlab hai "dematerialised" — kagaz wala share ab digital ho gaya. Bilkul jaise paisa jeb me gaddi bankar nahi ghumta, bank account me number bankar rehta hai. Paise ke liye bank account, shares ke liye demat account — bas yehi saara khel hai.

Demat khata kholne par aapko ek 16 ank ka khata number milta hai, jise BO ID kehte hain. Aapke saare shares isi number ke khaate me dikhte hain — kharida to aa gaya, becha to nikal gaya. Na kagaz ghumne ka darr, na hafton ka intezaar. Shares ke saath ETF jaise kuch aur saaman bhi isi khaate me rehta hai.

Demat aur Trading account — farak samjho, uljhan khatam

Ye do khate hamesha saath sunai dete hain, isiliye uljhan bhi sabse zyada yahin hoti hai. Ek seedhi misaal deta hoon. Maano aap sabzi mandi gaye. Ek hai aapka thaila — jo kharida, wo usmein aakar rukta hai. Dusra hai dukaan ka counter — jahan khade hokar sauda hota hai, paisa chalta hai. Demat account aapka thaila hai, shares rakhne ki jagah. Trading account wo counter hai, jahan se kharid-bech ka order lagta hai.

SawaalDemat AccountTrading Account
Kaam kya hai?Shares rakhnaShare kharidna-bechna, order lagana
MisaalThailaDukaan ka counter
Ismein kya rehta hai?Paisa nahi — shares rehte hainSauda karne wala paisa yahan aata hai

Isiliye sirf demat khol lene se share nahi kharid sakte — counter hi nahi hai. Aur sirf trading khata ho to delivery wala share aakar rukega kahan? Ghabrane ki baat nahi — aaj ke samay me broker dono khate ek hi form me, ek saath khol deta hai. Aapko alag-alag bhaagna nahi padta.

Khata kholne ke liye kya chahiye?

Form se pehle ye chaar cheezein paas rakh lo, kaam das minute me ho jayega:

Ek baat aur — income proof sirf tab manga jata hai jab aap F&O (futures-options) chalu karwana chahte ho. Sirf shares ki kharid-bech ke liye iski zaroorat nahi. Aur naye aadmi ko meri raay me pehle din F&O ki taraf dekhna bhi nahi chahiye.

Online khata kholne ke steps

  1. Jis broker ya app se kholna hai, usmein apna mobile number aur email do — OTP se shuruaat hogi.
  2. PAN number aur janm tithi bharo — aapki jaankari record se apne aap mil jayegi.
  3. Aadhaar se KYC pura karo — OTP se ya DigiLocker se.
  4. Apna bank khata jodo — account number aur IFSC. Yahi khata aage paise ke len-den me kaam aayega.
  5. Photo aur signature upload karo, aakhir me Aadhaar OTP se e-sign kar do. Kagaz par dastakhat aur courier wala zamana gaya.
  6. Khata number aur login ek-do din me mil jata hai — kai jagah kuch ghanton me bhi.

Poora kaam ghar baithe, phone se. Na daftar, na agent ke chakkar.

Khata kahan kholein — mere istemal wale options

Ye sawaal har koi poochta hai, to jawab bhi seedha deta hoon. Main khud Dhan par trade karta hoon — chart par se seedha order lag jata hai, mujhe wahi sabse sahi lagta hai. Isiliye pehla link usi ka hai. Baaki chaar bhi bade aur jaane-maane broker hain. "Sabse best" broker koi nahi hota — jiske charges aur app aapko jam jaayein, wahi aapke liye sahi hai.

  1. Dhan (mera khud ka broker) — khata kholna ₹0, AMC ₹0. Dhan par khata kholein
  2. Groww — naye logon ke liye sabse seedha-saadha app, mere kai dost yahi se shuru hue the. Referral code: M636FD. Groww par khata kholein
  3. Angel One — purana, bada naam; research aur salah wali cheezein yahan zyada milti hain. Angel One par khata kholein
  4. Upstox — referral par zero AMC aur ₹250 tak zero brokerage ka offer chal raha hai (offer badalta rehta hai, kholne se pehle app par ek baar dekh lena). Upstox par khata kholein
  5. FYERS — charts aur trading tools ke shauqeenon ke liye; referral code FRYMSUN par pehle mahine zero brokerage ka offer hai. FYERS par khata kholein

Aur ek imaandaar baat, chhupani nahi hai: upar ke saare link mere referral link hain. Inse khata khologe to mujhe chhota sa referral fayda mil sakta hai — aapko iske liye koi extra paisa nahi dena padta. Phir bhi mera sujhav wahi hai jo poore article me hai — link baad me, pehle charges wali poori list dekho. Sirf link dekh kar khata mat kholo, chahe link mera hi kyun na ho.

Ab asal kaam — share kharidna step by step

Ravi par wapas aate hain. Khata khul gaya, aur usne pehle 10 share kharidne ka faisla kiya. Hua kuch yun:

Pehle usne bank khaate se trading khaate me utna paisa dala, jitne ke share lene the. Dhyan do — paisa pehle trading khaate me aata hai, demat me nahi. Phir app me company khoji, quantity likhi 10, aur order lagaya.

Order do tarah ka hota hai. Market order — jo bhaav chal raha hai, usi par turant sauda kar do. Limit order — apni keemat tay kar do, sauda tabhi hoga jab bhaav wahan tak aayega. Naye aadmi ke liye meri raay seedhi hai: limit order lagao. Ek-do rupaye ka farak bazaar ki daud me soch se zyada mehnga pad sakta hai.

Order stock exchange (NSE ya BSE) jata hai. Wahan koi bechne wala mila, to sauda pakka — phone par "executed" dikh jayega aur shaam tak contract note email par aa jayega. Wo contract note hi aapke saude ka pakka saboot hai, use sambhal ke rakho.

Ab wo baat jahan naye log sabse zyada ghabrate hain — paisa trading khaate se turant kat jata hai, lekin shares demat me turant nahi dikhte. Shares agle karobari din aate hain. Ise T+1 settlement kehte hain: T matlab sauda wala din, +1 matlab uske agla kaam-kaaj wala din. Monday ko kharida to Tuesday ko demat me chamkega. Beech wali raat ghbrahat me guzaarne ki zaroorat nahi — niyam hi aisa hai.

Ek kaam ki baat aur — jab aap usi share ko dusri baar kisi aur keemat par kharidte ho, to aapki asal average keemat badal jati hai. Wo hisaab haath se karne ke bajaye Stock Average Calculator par dalte hi saamne aa jata hai.

Share bechna — wahi raste ka ulta safar

Bechna bhi lagbhag waisa hi hai, bas disha ulti. App me apne shares me se wo share chuno, quantity likho, SELL ka order lagao.

Beech me ek kadam aata hai jo naye logon ko chonka deta hai — bechne par demat se shares nikalne ki anumati deni padti hai. CDSL wale khaaton me iske liye TPIN naam ka chhota sa code register mobile par OTP ke saath aata hai. Ye ghbraane wali baat nahi, aapki suraksha hai — taaki aapke alawa koi aapke shares chu bhi na sake.

Sauda hote hi paisa T+1 par trading khaate me aata hai, wahan se aap use bank khaate me bhej sakte ho. "Bech diya, paisa turant bank me kyun nahi aaya?" — har naya niveshak yehi poochta hai. Jawab wahi hai: ek din ka settlement sab par lagta hai.

Charges ki asli kahani — "free account" ka sach

Ab wo hissa jiske liye ye article asal me likha gaya hai. Khata kholte waqt sab "zero" chillate hain. Par sach ye hai — demat khata khulna free hai, chalna free nahi hai.

ChargeKitna (aam taur par)Kab lagta hai
Account openingAksar ₹0; kabhi-kabhi ₹200–300Khata kholte samay, ek baar
AMC (saalana rakhrakhav)₹300–800 per saalHar saal, khata rakhne ke liye
DP charge₹15–25 + GST, har share parShare bechne par, har bechne wale din
BrokerageDelivery par kai jagah zero; intraday par per-orderHar kharid-bech par

AMC sabse seedha charge hai — khata rakhne ki saalana fees, chahe aap saal bhar ek share bhi na kharido. DP charge sabse chhupa hua hai: jab bhi aap koi share bechte ho, usi din, har alag share par ye chhota sa charge GST ke saath katta hai. Chhota lagta hai, par saal bhar ke saudon me achhi-khaasi rakam ban jata hai — aur zyadaatar log ise contract note me dekhte hi nahi.

BSDA wali rahat: SEBI ne chhote niveshakon ke liye Basic Services Demat Account (BSDA) ka niyam banaya hai. Agar aapke demat me rakhe shares ki kul keemat ₹4 lakh tak hai, to AMC zero lagta hai. Keemat ₹4 lakh se ₹10 lakh ke beech ho, to AMC saal ke ₹100 se zyada nahi lag sakta. Shart bas itni hai ki ye aapka eklauta demat khata ho.

Kai logon ka khata apne aap BSDA me hota hai aur unhe pata bhi nahi — apne khate ka status ek baar pooch lena kaam ki baat hai.

Aur "zero brokerage" ka matlab bhi saaf kar dun — uska matlab sirf brokerage zero hai. AMC lagega, DP charge lagega. Isiliye meri raay: broker chunte samay sirf "free" wala board mat dekho, uski poori charges wali list dekho. Wo list har broker ko dikhani padti hai — bas hum kabhi maangte nahi.

CDSL aur NSDL — ye do naam baar-baar kyun aate hain?

Shares asal me rehte kahan hain? Do badi sansthaon ke paas — CDSL aur NSDL. Inhe depository kehte hain. Misaal dun to ye do bade godam-network hain, aur aapka broker un godamon tak pahunchane wala agent hai, jise DP (Depository Participant) kehte hain.

Aapko aam taur par chunna nahi padta — broker jis depository se juda hai, khata wahi ban jata hai. Aapke liye farak bas khata number ki pehchaan me hai: NSDL wala number "IN" se shuru hota hai, CDSL wala sirf 16 ankon ka number hota hai. Kaam dono ka ek hi hai — shares surakshit rakhna aur hisaab rakhna, dono hi SEBI ki nigrani me. To dost ka khata CDSL me hai aur aapka NSDL me, to ismein "behtar-kharab" wala koi khel nahi hai.

Nominee jodna — do minute ka kaam, saalon ki rahat

Khata kholte samay ek chhota sa hissa aata hai — nominee. Zyadaatar log use "baad me dekh lenge" kehkar chhod dete hain. Ye is article ki sabse kaam ki baat ho sakti hai.

Nominee wo insaan hai jise, khuda-na-khasta aapko kuch ho jaye to, aapke shares kanooni taur par mil jate hain — bina court-kachehri ke lambe chakkar ke. Bina nominee ke parivaar ko kagazon ke jis jungle se guzarna padta hai, uski kahani kisi se poochhoge to nominee aaj hi jod doge.

✅ Niyam bhi sakht hai: nominee jodo, ya saaf-saaf ghoshit karo ki nahi jodna. Dono me se ek na kiya ho, to khata freeze tak ho sakta hai. Do minute ka online kaam hai — aaj hi kar lo.

Aam galtiyan jo naye log karte hain

Galti 1: OTP aur TPIN share karna

Aapka broker, bank ya CDSL-NSDL kabhi phone karke OTP ya TPIN nahi maangta. Jo maange, wo thag hai — chahe kitni hi meethi baat kare. "Guaranteed return" aur "pakki tip" wale groups isi OTP ke chakkar me khaate khaali karte hain. Niyam ek hai — OTP apna, paisa apna.

Galti 2: Charges kabhi dekhna hi nahi

Saal khatm hone par AMC kata, har bechne par DP charge kata — aur log hairaan rehte hain ki paisa gaya kahan. Har saude ke baad aane wala contract note padhna shuru karo. Usmein har charge line-dar-line likha hota hai. Jo padhta hai, wohi sawaal bhi kar sakta hai.

Galti 3: Ek ke baad ek chaar-paanch demat khol lena

Har jagah "free account" dekha, har jagah khol liya. Nateeja — chaar khaaton ka chaar gunaa AMC, chaar jagah ke email, aur hisaab kahin ka kahin. Aam aadmi ke liye ek sahi demat khata poora kaafi hai. Dusra tabhi kholo jab pehle wale se asal me koi dikkat ho.

Galti 4: Khata saalon tak yun hi chhod dena

Na share kharida, na khata band kiya — bas bhool gaye. Aise khate dormant ho jate hain, AMC judta rehta hai, aur jab saalon baad yaad aata hai to pehle purani KYC taza karo, tab kuch hoga. Istemaal nahi karna, to holdings zero karke band kar do. Band khata sabse sasta khata hota hai.

Galti 5: Kholte samay sab kuch "tick" kar dena

Form bharte waqt jaldi me log F&O aur margin jaise hisse bhi chalu kar lete hain, jinka matlab bhi nahi pata hota. Pehle delivery wale shares samjho, khata chalana seekho. Baaki hisse baad me bhi chalu ho jate hain — bazaar kahin bhaag nahi raha.

Aksar puche jaane wale sawal

Q: Demat account kholne ke liye kya-kya documents chahiye?
PAN card, Aadhaar card (usse juda mobile number chaalu ho), bank ka saboot (cancelled cheque ya statement) aur ek photo. Income proof sirf F&O chalu karwane par manga jata hai.

Q: Kya sirf demat account se share kharid sakte hain?
Nahi. Share kharidne ke liye trading account bhi chahiye — demat sirf shares rakhne ki jagah hai. Isi liye broker dono khate ek saath khol deta hai.

Q: Demat account kholna free hai to broker paise kaise kamata hai?
AMC se, bechne par lagne wale DP charge se aur brokerage se. Khata khulna free hota hai, uska chalna nahi. Isiliye kholne se pehle poori charges wali list dekhna samajhdari hai.

Q: Share kharidne ke kitne din baad demat me dikhta hai?
Agle karobari din. Bharat me T+1 settlement chalta hai — Monday ko kharida share aam taur par Tuesday ko aapke demat me dikhega.

Q: CDSL aur NSDL me kya farak hai?
Dono hi depository hain — kaam ek hi hai, aapke shares surakshit rakhna. Farak bas khata number ki pehchaan ka hai: NSDL wala "IN" se shuru hota hai, CDSL wala 16 ankon ka number hota hai. Aapke broker ke hisaab se khata kisi ek me banta hai.

Q: Kya ek se zyada demat account khol sakte hain?
Haan, khol sakte hain — koi rok nahi hai. Par har khate ka AMC alag lagega aur hisaab sambhalna mushkil hoga. Aam taur par ek khata hi kaafi hota hai.

Q: Nominee jodna kyun zaroori hai?
Taaki aapke baad aapke shares nominee ko bina lambe kanooni chakkar ke mil jayein. Nominee na jodo aur "nahi jodna" wali ghoshna bhi na karo, to SEBI ke niyam se khata freeze ho sakta hai.

Q: Share bechne par paisa kab milta hai?
Bechne wala paisa T+1, yani agle karobari din, aapke trading khaate me aata hai. Wahan se use bank khaate me bhejna aapke haath me hai — bank me turant nahi aata.

Q: Kya demat account me mutual fund bhi rakh sakte hain?
Haan, mutual fund ki units demat roop me bhi rakhi ja sakti hain. Lekin ye zaroori nahi hai — zyadaatar log apne mutual fund aam (non-demat) roop me hi rakhte hain, aur wo bhi bilkul theek hai.

Q: Demat account band kaise hota hai?
Pehle khaate ke saare shares bech do ya dusre demat me bhej do, bakaaya charge saaf karo, phir broker ko band karne ka anurodh (closure request) do. Holdings zero hue bina khata band nahi hota.

Share do keematon par kharida? Average nikaalna hai?

Do alag keematon par liye gaye share ki asal average keemat haath se nikaalna tedha kaam hai — calculator se ek minute me saaf ho jata hai.

🧮 Stock Average Calculator kholo
⚠️ Educational purpose only — not financial advice. Apne advisor se salah lein.
Ye article sirf aam jaankari ke liye hai. Charges ke aankde aam bazaar range me diye gaye hain — har broker ke asal charges alag ho sakte hain, isiliye khata kholne se pehle us broker ki charges wali list khud dekh lein. Yahan kisi share, broker ya product ki salah nahi di gayi hai, aur na kisi return ka vaada kiya gaya hai. Bazaar me jokhim hota hai; faisla apni sthiti samajh kar aur advisor se salah karke hi lein.